Hewlêr (Rûdaw) – Amnesty ji Tirkiyeyê dixwaze ku li Efrînê binpêkirinên li dijî mafên mirovan rawestîne.
Rêxistina Lêborînê ya Navneteweyî (Amnesty International) li ser binpêkirinên artêşa Tirkiyeyê û komên çekdar ên mixalefeta Sûriyeyê daxuyaniyek belav kir.
Di daxuyaniyê de hat ragihandin ku “hêzên Tirkiyeyê û komên çekdarên ser bi Tirkiyeyê li Sûriyeyê, binpêkirinên metirsîdar li dijî mafên mirovan dikin û ew rewş didome.”
Rêxistina Lêborînê ya Navneteweyî (Amnesty International) da zanîn:
“Xelkê Efrînê ji ber binpêkirinên komên çekdar ên Sûriyeyî ku ji aliyê Tirkiyeyê ve tên biçekkirin û amadekirin dinale.”
Amnestyê behsa binpêkirinên ku tên kirin jî kir û anî ziman:
“Binpêkirinên ku dibin, girtina neyasayî, windakirina bizorê, destdanîna ser mal û milkan, talankirina ku hêzên Tirkiyeyê paşguh kirine.
Destdanîna ser dibistanan ji aliyê komên çekdar û hêzên Tirkiyeyê ve, bi awayekî ku bi hezaran zarok ji xwendinê bêpar mane.”
Birêvebirê Lêkolînên Rojhilata Navîn ê Amnestyê anî ziman:
“Tirkiye hêza dagirker e li Efrînê, lewma ew bi parastina sivîlan berpirs e.
Heta niha jî hêzên wê di vî erkî de, bi ser neketine û ne jî ew dikare ji wê berpirsyariyê bireve ku komên çekdar kiryarên xwe yên xirab bikin.”
Amnesty tekezî li ser wê yekê dike ku divê Tirkiye were agahdarkirin û dawiyê li wan binpêkirinan li Efrînê bîne.