Hewlêr (Rûdaw) – Parêzerê Kurd Sidki Zîlan behsa hevdîtina xwe ya bi Selahattîn Demîrtaş re kir û eşkere kir ku ew dixwaze gelên Tirk û Kurd bigihên aştiyeke mayîne.
Parêzer Sidki Zîlan yekşema borî li Girtîgeha Edirneyê Hevserokê berê yê Partiya Demokratîk a Gelan (HDP) Selahattîn Demîrtaş ziyaret kir.
Sidki Zîlan bû mêvanê Bultena Bakur a Rûdawê û bersiv da pirsên pêşkêşkara Rûdawê Hêvîdar Zanayê.
“Xelk ji Demîrtaş hez dike”
Sidki Zîlan behsa naveroka civîna xwe ya bi Demîrtaş re kir û got:
“Hûn dizanin ev 8 sal in Demîrtaş di girtîgehê de ye. Me heta aniha 4 caran ew ziyaret kir.
Ti kesî em neşandine cem Demîrtaş, ji aliyê însanî, ji aliyê Kurdayetiyê ve ev karê me ye. Birêz Demîrtaş merivê me ye.
Birêz Demîrtaş jî dixwaze me bibîne.
Em randewûyê dixwazin, heger ew jî musaîd be em hevdû dibînin û hevdîtina xwe pêk tînîn.
Hevdîtina me rastî gotin û bangên Devlet Bahçelî hatin û me jî hin tişt nivîsandin.
Hinek kesan rast fêm kir û hinek kesan jî xelet.
Ez ne berdevkê Demîrtaş im. Ew tiştên ku ez dibêjîm dîtin û şîroveyên min in. Ez bes dîtina xwe dibêjim û dinivîsim.
Hûn dizanin kî diçe girtîgehê û tê qeydên wan hene.
Kî diçe girtîgehê û tê ew tê qeydkirin, kê ziyareta wî kiribe xuyaye.
Di destên min de qeydên ziyaretan nînin.
Beriya me 2 hevalên hêja yên parêzer li cem wî bûn.
Piştî nîvroj em pê re civiyan, me hevdîtin kir, me li tenduristiya wî pirsî. Wî jî li halê me pirsî.
Helbet Demîrtaş aktorekî girîng e, Hevserokê HDPyê bû.
Kurdên me ji wî hez dikin. Ji bilî me çepên Tirkiyeyê, kesên xwedî wîjdan ji wî hez dikin.
Yek ji wan kesên ku herî zêde jê tê hezkirin û jê re sempatî heye Demîrtaş e.”
“Demîrtaş aştîxwaz e û dixwaze civak jî li hev werin”
Parêzer Zîlan behsa helwesta Demîrtaş a li ser pêvajoyê jî kir û wiha berdewam kir:
“Tişta min fam kir ev e, Demîrtaş dinivîse, di dadgehan de diaxive û wisa diyar e ji xwe Demîrtaş mirovekî aştîxwaz e.
Dixwaze dewlet û PKK li hev werin û dibêje, ev têrê nake divê civak jî li hev werin, hûn dizanin di navbera civakê de dubendî heye.
Hinek êrişî Kurdayetiyê dikin û naxwazin Kurd bigihên mafên xwe.
Ez niha ne aktorekî aktîf ê siyasî me û ez nizanim bê ka piştî wan gotinên Devlet Bahçelî pêvajoyek heye yan nîne.
Wisa diyar e, li cem AK Partî û MHPyê tiştek heye û CHP jî bi erênî lê dinêre û CHPyê got, tiştekî erênî hebe ez dê bibim alîkar.
Hûn dizanin Serokê CHPyê jî çû Edîrneyê û Sellahattîn Demîrtaş dît û pê re axivî.
Demîrtaş aştîxwaz e û dibêje, divê civak jî milet jî li hev werin û aştiyê bikin û aktorên serekî jî li hevdû bikin.
Em hemû dê bi vê re kêfxweş bibin û dê Demirtaş jî kêfxweş bibe û ya ku min fam kiriye ev e.
Demîrtaş ji me re got, gelek heval mîna we diçin û tên ziyareta me, ji aliyê CHPyê, ji aliyê DEM Partiyê û bêguman hin aliyên AK Partiyê jî tên ku ji bo çi ye ez nizanim.
Ez dilê însanan nizanim, her kî were ez ji wan re behsa aştiyê dikim û dibêjim aştî baş e.
Çareserkirina Pirsa Kurd dê bandorê li Tirkiyeyê û tevahiya xelkê Kurdistanê, doza Filistînê û Ewropayê jî bike.
Demîrtaş wekî parezerekî doza heq û mafê mirovan kiriye û wisa dest bi siyasetê kiriye.
Kedeke wî ya zêde di mafên mirovan de heye.
Bûye namzedê Serokkomariya Tirkiyeyê. Demîrtaş dixwaze hem gelê Tirkiyeyê, hem gelê Kurdistanê bigihên aştiyeke mayînde.
Şiroveya me ew e ku Demîrtaş li derve be dikare baştir ji bo aştiyê rol bilîze.”
Parve bike li ser
Share on Facebook
Share on Twitter
Share on Whatsapp
Share on Telegram
Share on Viber